بسم الله الرحمن الرحيم

(هذى القصه منقوله )


سآره + خآلد
ببدآية آلقصه حبيت آقولكم آنهآ قصه حقيقه لكن آنآ مغيره آسمآء آلشخصيآت
آتمنى آني آتوفق بتوصيل آلقصه

سآره بنت عم خآلد
ويحبون بعض من يومهم صغار لكن ولآ وآحد منهم صرح للثآني بحبه
وبدآ خآلد يلمح لسآره آذآ جتهم آلبيت يجيب لهآ جآلكسيآت وحركآت طبعآ كآنو صغآر
لين كبرو وكبر آلحب معهم وعرفت سآره بمشآعر خآلد تجآههآ
لكن خآلد للحين مآعرف لآن سآره خجوله
خآلد جته فكره آنه يقول لآخته تكتشف مشآعر سآره تجآهه
هدى آخت خآلد بأحد جمعآت آلعآئله مسكت سآره على جنب وبدت تستفسر
وتقولهآ آلى متى وآنتم تخبون عن بعض وقآلت لهآ آلحين تقولين لين وش تحسين تجآه آخوي
وخلي هآللعبه تنتهي وكل وآحد يكشف حبه للثآني
آستحت سآره لكن قررت آنهآ تكشف كل شي عشآن ترتآح
وصآرحتهآ
طبعآ سآره كآنت بقدر من آلجمآل وخجوله ممآ يخلي خآلد يعشق ترآبهآ ولآ يفكر بآنسآنه غيرهآ تشآركه حيآته
صآر عمر سآره 18 وعمر خآلد 20
كآن فيه زوآج لآحد آقآربهم بمدينه آلريآض وسافرت سآره مع ابوهآ وخوآتهآ لحضور هـ آلزوآج
ولما رآحو وحضروه من بكرى نآس آتصلو على آبو سآره وطلبو يدهآ من آلريآض
وآبوهآ وآفق على طول من غير حتى انه يسئل عن الولد
البنت ماقدرت تقول شي عند ابوها لانه عصبي وقرر خلاص
رجعو لمدينتهم ووصل الخبر لخالد ان ساره انخطبت
باحد جمعات العائله اللي حضرها خالد وساره خالد كان معصب ومتنرفز وقال لاخته هدى ابي اشوف ساره الحين
قالت ايش ؟ انت مجنون ؟ بتفضحنا عند جماعتنا ؟
قالها انا ماهمني احد ناديها لي بقولها كلمه بس
نادتها وجت ساره طبعا معهم هدى وقالها ساره بس بقولك كلمه وحده
( اذا تزوجتي راح تسمعين خبر وفآتي ) ورآح وتركهآ
آنهبلت سآره وقعدت تبكي ليل ونهآر لآن آلآمر مو بيدهآ وآبوهآ عصبي مآتقدر تقول شي
اتفقو مع الخطيب اللي طلب يد ساره وراحو للرياض وملكت ساره
وهي كانت صغيره عمرها 18 واللي خاطبها عمره فوق الـ 30
بعد ماملكت مادرى خالد بالموضوع وحاولت اخته تخبي عنه
وصار عندهم زواج ثاني بالشرقيه وسافرو العائله يحضرونه وراحو معهم خالد وساره
وصلو الشرقيه وراح خالد ينزل ثوبه عند الغسال عشان الزواج
ورجع الشقه وفيه عمه ابو ساره
وقاله وش فيك خالد ليه ماباركت لي بملكة بنتي
خالد نغزه قلبه وقاله اي بنت ياعمي ؟
قال بنتي ساره قبل اسبوع ملكت على فلآن
خالد دارت فيه الدنيا بس مايبي يبين لعمه حزنه وضيقته
وقاله مبروك ياعمي جعلك تفرح بضناها
وطلع خالد من الشقه وعمه ماحس بشي
وقال للشباب قومو نبي نستاجر دبابات
قالو خالد بلا استهبال ورانا زواج بنروح له عسى يمدينا نتجهز وانت تقول دبابات
قال انا خاطري بدباب اللي بيروح معي يالله يمدينا قبل الزواج الحين حنا المغرب
قالو الشباب اوك نروح
وخالد مقصده يبي يسوي اي شي عشان ينسى الخبر اللي سمعه يبي اي شي يبعد عنه الافكار
مالقى غير الدبابات واللعب مع الشباب
استاجرو دبابات وبدو لعب وضحك وتفحيط وحركات شباب
خلص الوقت وقالهم العامل خلاص اللي يبي ساعه زياده يدفع عشره
قالو لا خلاص ورانا زواج وبنروح نطلع ثيابنا ونتجهز
قالهم خالد انا ابي العب شوي
قالوله يارجال انزل مايمدي بكرى نجي ان شاء الله
قال لا انا ابي الحين من بيسابقني
قاله واحد من الشباب انا ابي اسابقك
ودفعو لساعه زياده وبدا خالد وخويه يتسابقون والشباب يشجعونهم
وكانو فوق مكان طويل كله تراب وكان طويل مره كأنه برج
وهم فوقه يلعبون
التفت خالد للشباب وضحك لهم ورفع يده يسلم يعني اني قربت للنهايه
فجأه صرخو الشباب خاااااااااااااااااااااااااااااااااااالد انتبه
وقف خويه اللي يسابقه من الصدمه والشباب راحو يركضون وكان من ضمن الشباب اخو خالد اللي اصغر منه
عجز يستوعب اللي صار لاخوه

واللي صار لخالد

ان اللي هم فوقه فيه مكان ينزل من عنده وخالد يحسبه نزله عاديه لكنه طلعت مستقيمه يعني محد ينزل من عندها يطيح على طول
وكان الطعس اللي هم فوقه طويل مره فـ وش صار لخالد
طاح من فوق الطعس على الارض وكان فـ الارض حديد وطاح خالد وراسه على الحديد والدباب طاح فوقه
ركضو الشباب ونزلو بس للاسف لقو خالد مهو خالد اللي يعرفونه
كان ينزف من الدم حاولو الشباب يشيلون الدباب عنه لانه ثقيل مره وكبير
وشالوه ولقو خالد مثل الجثه
شالوه بسرعه وشافهم واحد معاه جمس ووقف بسرعه وقالهم ركبوه بسرعه
ركبوه الجمس ونصهم ركبو معه والباقي راحو سيارتهم ولحقوهم
وصله لاقرب مستشفى
يوم نزلوه الجمس صار كله دم انصدم الرجال من حالته قال انه ميت لامحاله من كثر الدم اللي ينزف منه
اول مادخلوه المستشفى قالو العنايه المركزه على طول لانه داخل بغيبوبه
لما كشفو عليه طلع الدكتور متضايق
ركض له اخو خالد والشباب قالو طمنا يادكتور شلون خالد ؟
قال للاسف خالد متوفي ( دماغيا )
والخلايا اللي بجسمه كله ميته والضربه كانت على راسه بالحديد ولقينا المخيخ متفتت
انهار فهد اخو خالد وقعد يبكي من صدمته من حالة اخوه
والشباب ضاقت صدورهم
طبعا ابو خالد كان مسافر لمصر مع زوجته الثانيه وماعرف بالموضوع
اتصلو على عمه ابو ساره وكان نايم بالشقه فوق الكنب
والشباب يدقون عليه وهو نايم سمعت ساره الجوال وهي قاعده تتجهز للعرس
وجت ولقت المكالمات ونغزها قلبها
صحت ابوها وقالت يبه جوالك له ساعه وهو يدق
رد ابوها وهو نايم وقال نعم
سمع صوت فهد يبكي ويقول خالد ياعمي خالد
انهبل العم وفز وقال خالد ! وووش فيه !
هنا ساره حست الدنيا تدور وحست انه فيه شي
بعدها قال ابوها يالله يالله انا جاي وقام بسرعه وقعد يلبس
قالت ساره يبه خير وش صاير
قال خالد مسوي حادث والحين هو بالعنايه
ساره من الصدمه وقفت ساعه بمكانها ماتعرف وش تسوي تبكي ولا تضحك ولا تهرب ولا وش تسوي
دخلت على اختها بالغرفه وقالت نوره قالت هاه وش بك ! قالت خالد ! قالت وش فيه ؟ قالت خالد مات وقعدت تضحك وهي تقولها
قالت نوره هيه يامجنونه وش تخربطين انتي خالد توه طالع من عند ابوي مافيه شي
تعوذي من ابليس وتجهزي قبل يخانقنا ابوي لو تأخرنآ
قالت اقولك خالد مااااااااااااات توه اتصلو على ابوي وقالو بالعنايه
قالت شلون مات وهو بالعنايه خلاص قولي الله يشفيه
طبعا نوره اخت ساره تتصف بالبرود ومافيه شي يهمها بالدنيا
راحو للزواج ساره ونوره ومرت ابوهم الكويتيه بس ساره عقلها وقلبها وتفكيرها مع خالد مو مع الناس
وصلو الزواج وقعدو بس شوي فجأه اتصل ابوهم على زوجته وقال اطلعو بسرعه
قالت وش فيك ليش نطلع
قالها بسرعه اطلعي انتي والبنات انا انتظركم
قالت طيب يالله ونادت البنات وطلعو
وركبو السياره ولاحظت ساره ان ابوها وجهه شاحب
سالته زوجته وش فيك طلعتنا قال خالد متوفي دماغيا
ساره قعدت تبكي من ورى النقاب وتذكرت كلمته يوم قالها اذا تزوجتي راح تسمعين خبر وفاتي
اتصل العم على اخوه اللي هو ابو خالد اللي كان بمصر
وكان توه داخل الملاهي مع زوجته وعياله الصغار يبي يلاعبهم
وقاله ولدك كذا وكذا والحين هو بالمستشفى بالشرقيه حاول تجي
انهبل ابوه وطلع بسرعه وراح لاقرب مكتب عشان يحجز اول طياره للسعوديه
سالته زوجته خير وش فيك قال ولدي بالعنايه قالت ببالها اووف من عيال ذا العجوز لازم يخربون وناستي
حجز لديرته ونزل زوجته وعياله ورجع حجز للشرقيه وراح للمسشتشفى
دخل شاف خالد كله اسلاك واجهزه وسأل الدكتور عن حالته
قال نسبة وفاته 99 بالميه ونسبه نجاته 1 بالميه والله اعلم وحنا مجهزين شهادة الوفاة
لان مافيه ولا خليه حيه نقول يمكن فيه امل
اتصلت ام خالد على زوجها وهي في حاله يرثى لها وقاعده تبكي وتقول الحين تجي تاخذني لولدي
طبعا اهله كانو مجهزين انه بعد مايرجع خالد من الشرقيه بيروحون يصيفون بماليزيا ومجهزين شناطهم
وصارت الشناط هذي مصيرها للشرقيه وهم رايحين يشوفون اخوهم
وحده من خوات خالد الكبيره كانت بالنسبه له مثل الام
حنوووونه وماتنام لين اخوانها وخواتها ينامون وهي اللي تاكلهم وتشربهم
وقبل مايسافر خالد كان حاط راسه على حضنها وهي تلعب بشعره ويسولفون
كان يحبها مره من بين خواته ويعتبرها امه
حجز لهم وجو للشرقيه وقالت اخته ابي ادخل عنده ابي اكلمه انا ادري انه يسمعني
دخلت وبدت تتكلم وتقوله خالد انا اختك انا امك لاتتركنا ياخالد حنا ننتظرك ترجع لنا
وبنروح لماليزيا مع بعض وبنصيف وانت معنا وقعدت تتكلم معه
فجأه صار يرتفع ضغط خالد بالجهاز
ودخلت الممرضه وقالت لاخته اطلعي خلاص
وطلعت وهي تبكي وتدري ان اخوها يسمعها
مرت غيمة الحزن على اهله وعمامه وخواله وعلى ساره بالذات اللي مانشفت دمعتها ابد
قعد خالد بالعنايه قرابة الـ 18 يوم وبعدها قال الدكتور لابو خالد ابيك بالمكتب شوي
راح معاه للمكتب وقعد يكلمه ويقوله ياابو خالد ولدك عايش على الاجهزه والمخيخ متفتت عنده وخلاياه ميته
ومافيه اي شي يبشر بخير طول هذي الايام
ياابو خالد ولدك قاعد يتعذب على هالاجهزه خلنا نشيل عنه الاجهزه وادعو له بالرحمه هذا قدر الله والموت حق
ابو خالد متطوع وقعد يفكر بكلامه قال صح يادكتور ولدي والاجهزه اللي عليه تعذبه وتعذبنا كلنا
توكل على الله يادكتور وشيل الاجهزه والله يكتب له الرحمه
شالو الاجهزه عن خالد
وخالد
فارق الحياه
فارق ساره
فارق امنياته واهله وعزوته
وانتقل لربه الغفور الرحيم
وصل الخبر لاهله وكل من يعرف خالد انه مات
وراح ينقلونه بطياره لديرته ويصلون عليه
رجعو ديرتهم ونقول جثة خالد بطياره
صلو عليه وشالوه لقبره ابوه واعمامه يمشون ورى جثته ويبكون وبحاله يرثى لها
دفنوه وانتقل خالد لمثواه الاخير
اما ساره ؟ صارت مثل المجنونه ! ماتتكلم واذا نطقت قالت خالد وين خالد هاتو لي خالد
واختها واخت خالد والكل يحاول يهديها لانها جاته حاله نفسيه فجأه تنهار وتبكي ويغمى عليها وتقول انا السبب
انا اللي حرمت عمي وامه من خالد هو قالي اذا تزوجتي راح تسمعين خبر وفاتي
كله مني انا ليتني ميته ولا سمعت هالخبر
انتهى العزآ ثلآث آيآم
وقرب زواج ساره
جو اهل خطيبها وخطيبها من الرياض عشان الزواج
طبعا ساره شرطت بزواجها مايكون فيه اغاني او طق
تقديرا لخالد وانه توه متوفي
جا يوم زواجها وراحت للقاعه وتجهزت وجلست بالغرفه
والكل دخل يسلم عليها وهي تجامل وتبتسم
وزفوها من غير طق او اي شي
كان الزواج مو حلو ولا اي عروس تتمناه
مرت الايام وعاشت ساره بالرياض
وابو خالد قال لاهله انا وعدتكم بسفره لماليزيا وراح اسافر فيكم تغيرون جو بعد اجواء العزا والحزن
سافر وقعدو نص شهر هناك
جت ساره لديرتها بتزور ابوها وخواتها ودخلت البيت ونغزها قلبها شمت ريحه عمرها ماراح تنساها
ريحة خالد
وركضت لاختها قالت وينه ؟ قالت هلا ساره من تقصدين ! قالت خالد وينه
قالت للحين وانتي بكابوس اسمه خالد خالد مات من زمان ادعي له بالرحمه
قالت بس انا شامه ريحته اعرف هالريحه
قالت ايه عمي جاب ثوب خالد وبوكه وجواله قال خلهم عندك عشان امه ماتشوفهم وتتعب نفسيتها
والتفت ساره للطآوله ولقت ثوب خالد والبوك والجوال
خذت الثوب وقعدت تشمه وطاحت على الارض وقعدت تصيح وتقوول اشتقتله
يارب خذ روحي وادفني جنبه
انا اللي ذبحته كله مني انا
وبدت تهديها اختها وخذت منها الثوب واغراض خالد وخبتهم بغرفة ابوها قبل يدخل زوج ساره ويشوف اللي صاير

انتهت القصه او بالاحرى تعبت

ساره تطلقت من زوجها لانها ماقدرت تحبه



جابت منه بنتين زي القمر وهم عايشات مع ابوهم بالرياض

وكل شهر تروح مره تجيبهم من الرياض ويقعدون عندها اسبوع