شن ذكرني ** تعودنا غيابك بعد ما سهرني** يا غاليه بالله

قالت شوقي ** زايد علي ضاقن معاه اخلوقي
دمعي نزل يبيك يا معشوقي**شوقي لزولك يا الغلا كاسرني
الله و النبي يا شمس هيا توقي **وانهي منامي هالحلم دردرني

قالت زولك ** املازم افكاري كيف بس انطولك
مايوم في قلبي انتهى مفعولك**حبك في قلبي يا الغلا آسرني
ماهو بطوعي القلب ماشي شورك**حتى بعيد طيفك انت آمرني

قالت طيفك ** عايش معايا يا سمح توصيفك
نا انقولك دور جديد وليفك **نا كنت ليك بس النصيب جبرني
تميت مع واحد امخالف كيفك ** هدا نصيبي يا غلاي اعذرني

فتحت عيوني ** لقيته حلم فيه الغوالي جوني
وين يخطرو زادو الوجع بكوني ** نذكر الماضي دمعتي تغمرني
الله و النبي غيبو علي هنوني ** خلو قليبي ينسى اللي هاجرني

يا قليب انساه ** غلايا اليوم قاعد امعاه ضناه
و ادعي المولى يحفظه يرعاه **ما يخطر علي ما يوم يذكرني
و دور جديد ان شا الله تلقاه **و زيد الدعى ننسى الغلا قدرني